من نحن

قبل ما “محمصة مستر رائد” تبقى مكان معروف بالقهوة المختصة كانت مجرد عربية قهوة صغيرة، واقف وراها ناس بتحب القهوة فعلًا

في الوقت ده، كانت القهوة بالنسبة لمعظم الناس بسيطة ومعتادة، قهوة تركي بنجيبها من مطاحن قهوة ونقدّمها للناس اللي بتحب القهوة زينا، لكن وسط كل ده كان فيه سؤال واحد بيشغلنا طول الوقت:

“يعني إيه إسبريسو حقيقي؟”

وقتها، القهوة المختصة ماكنتش منتشرة بالشكل اللي نعرفه دلوقتي، وحتى مفهوم الإسبريسو نفسه كان غامض بالنسبة لناس كتير، لكن كان عندنا فضول حقيقي نفهم أكتر

القهوة مش بس نشربها!

وكان حلمنا وقتها بسيط وصعب في نفس الوقت وهو إننا نصنع قهوتنا بنفسنا، وإننا نعمل إسبريسو من عندنا إحنا

التحدي ماكنش سهل لأن الإسبريسو اللي في السوق كله تقريبًا كان جاي من إيطاليا، من ناس قضت سنين طويلة تتقن التحميص وتفهم تفاصيل القهوة

وإحنا ماكنّاش عايزين نقلدهم لكن كنا عاوزين نفهم الحباية نفسها، إزاي اتحمصت؟، وإيه اللي حصل فيها علشان توصل للطعم ده؟، وإزاي نقدر نطلع نفس التوازن والوضوح من غير ما تفقد شخصيتها؟

ومن هنا بدأت الرحلة الحقيقية!

بدأنا نجرب، ونغلط، ونعيد من البداية مرة بعد مرة

كنا أحيانًا نبوّظ batch كامل، وأحيانًا نفضل ساعات نعدّل درجة أو ثانية واحدة علشان بس نوصل لطعم إحنا مقتنعين بيه فعلا!

وبعد شهور طويلة من التجارب طلع أول إسبريسو من عندنا حسينا إنه مظبوط، طعمه واضح، قوامه متوازن، وفيه إحساس مختلف

وقتها افتكرنا ببساطة فلسفة الإسبريسو الإيطالي الحقيقي اللي هي الوضوح، واحترام شخصية القهوة بدون مبالغة

ولما واحد من الموردين جرّبه وافتكره نفس الإسبريسو الإيطالي اللي كنا بنشتغل عليه

ساعتها عرفنا إننا بدأنا نمشي في الطريق الصح، لكن الرحلة ماوقفتش بس عند أول إسبريسو ناجح لأننا قررنا نتعلم بشكل أعمق

درسنا التحميص، وفهمنا تأثير كل مرحلة على الطعم، واتعلمنا إزاي نقرأ الحباية نفسها

وخدنا كورسات من Specialty Coffee Association (SCA)، وبدأنا نطوّر شغلنا خطوة بخطوة، واشتغلنا على أنواع مختلفة من القهوة، لحد ما وصلنا لاختيارنا الحقيقي:

"القهوة المختصة"

وعلى مدار أكتر من 15 سنة فضلنا بنتعلم، ونجرب، ونفهم أكتر لحد ما بقى عندنا إيمان واضح:

إن التحميص مش مجرد حرارة ووقت، لكن فهم للحباية نفسها، إمتى تحتاج وقت أطول، وإمتى تسيبها تعبّر عن نفسها، وإزاي تطلع أفضل ما فيها من غير ما تفقد هويتها

واللي وصلنا لكل ده ماكانش مجرد هدف تجاري، كان حاجة ابسط بكتير وهي حبنا الحقيقي للقهوة

والنهاردة، “محمصة مستر رائد” في إسكندرية مش مجرد مكان بنحمّص فيه القهوة

دي نتيجة رحلة طويلة بدأت بسؤال بسيط، وكملت بالشغف، والتجربة، والتعلّم ولسه مستمرة مع كل حباية بنحمّصها لحد النهاردة، لأننا ببساطة بنؤمن إن القهوة المختصة مش تعقيد، دي رحلة تستاهل تستمتع بيها